Табигый байлыклар турында китапта инкыйлабка кадәрге әдәбият кулланылачак
Галимнәр хайваннар һәм үсемлекләрнең кайбер атамаларын татар теленә тәрҗемә итү өчен, инкыйлабка кадәрге әдәбиятны өйрәнәчәк.
(Казан, 13 август, “Татар-информ”, Динә Йосыпова). Татарстанның табигый байлыклары турында энциклопедияне татар телендә нәшер итәргә ниятлиләр. Энциклопедияне төзегәндә 1917 елгы инкыйлабка кадәр булган әдәбият та кулланылачак. Бу хакта тарих фәннәре докторы, ТР Фәннәр академиясе мөхбир әгъзасы, ТР Фәннәр академиясенең Татар энциклопедиясе һәм төбәкне өйрәнү институты директоры Искәндәр Гыйләҗев сөйләде.
“Галимнәргә зур эш башкарасы бар, кайбер үсемлекләрнең һәм хайваннарның исемнәре татар теленә тәрҗемә ителми. Бу – зур проблема, күп кенә атамалар киң катлау кешеләргә билгеле түгел. Шуңа күрә, мөгаен, 1917 елгы инкыйлабка кадәр булган әдәбиятны да күтәрергә туры килер”, - диде Искәндәр Гыйләҗев матбугат конференциясендә.
Галим авторларның китапның рус телле вариантына татар тәрҗемәсен аңлы рәвештә кертмәүләрен ассызыклады.
“Киләсе елда татар телендә вариант булдыру буенча планыбыз бар, хәзер без техник биремне эшлибез. Бу – тәрҗемә генә түгел, ә оригиналь макетка йөз процентлы өстәмә дә булачак”, - дип билгеләп үтте мәгълүмати системалар һәм экологик агарту идарәсе башлыгы Дамир Вәлиуллин.
Биология фәннәре докторы, РФ атказанган экологы, Идел-Кама дәүләт табигать биосфера тыюлыгы директоры Юрий Горшков кайбер атамаларның латин телендә генә булуын һәм әлегә кадәр хәтта рус телендә дә тәрҗемәсе булмавын билгеләп үтте.
Бүгенге көндә проектның чыгу датасы, тиражы һәм финанслау турында хәбәр ителми.