news_header_top
Руc Тат
16+
news_header_bot
news_top
Җәмгыять 16 июль 2020 14:11

Таһир Һадиев: Балтырган бер килсә, ул китми, ә халыкны куа

«Ул гади чүп үләне түгел, куркыныч үсемлек», — диде депутат.

Скопировать ссылку

(Казан, 16 июль, «Татар-информ», Гөлнар Гарифуллина). ТР Дәүләт Советы депутаты Таһир Һадиев республикада балтырган күпләп таралу мәсьәләсе турында чыгыш ясады. «Балтырган бер килсә, ул китми, ә халыкны куа», — диде ул бүген Дәүләт Советының унберенче утырышында.

«Балтырган безгә 70 еллар азагында мөгезле эре терлекне каты азык белән тәэмин итү барышында килде. Орлыклар Татар авыл хуҗалыгы фәнни-эзләнү институты аша таралды. Беренче тапкырдан ук җыйганда, противогаз кияргә кирәклеген, ашатканда начар ис килүен аңладылар. Ул шартлы рәвештә китте, шул вакыттан авыл хуҗалыгы кырларында булмады, ләкин барыбер ташландык җирләрдә, елга буйларында калды. Бүген бу күрсәткеч ике елда 9 тапкыр артты», — диде.

Таһир Һадиев депутатлар РФ Хөкүмәтенә, төбәкләргә мөрәҗәгать иткәнен һәм хуплау тапканнарын искәртте. «2019 елда 10 млн сум акча бүлеп бирелгән иде, кызганыч, подрядчы компетент булмады, акчаны үзләштерә алмады, кире кайтарды. Бу елга 20 млн сум каралган иде, ләкин барыбер бу эш өстенлекле булмады. Бу бюджетның 0,1-0,2 процентын тәшкил итә», — диде.

Депутат былтыр балтырган белән 39 кеше тәнен пешергәнен искәртте. Быел беренче яртыеллыкта 35 кеше балтырганнан пешү җәрәхәтләре алган. «Ул гади чүп үләне түгел, куркыныч үсемлек. Моңа игътибар юнәлтергә кирәк. Без үзебез инициатор идек, Россия төбәкләре безне хуплаган иде, ә үзебез бу мәсьәләдән читкә киттек», — диде Таһир Һадиев.

«Быел мониторинг уздыруны, киләсе елга чаралар системасын булдыруны сорыйм», — диде депутат.

 

#Сосновский балтырганы
news_right_1
news_right_2
news_bot