Төркия Президенты Татарстан Президентын Республика көне белән котлады
Котлауларга Төркия чит ил эшләре министры Мәүлүт Чавашоглу кушылды.
(Казан, 30 август, “Татар-информ”). Төркия Президенты Рәҗәп Эрдоган Татарстан Президенты Рөстәм Миңнехановка Татарстан Республикасы көне белән котлап телеграмма юллаган. Бу хакта Татарстан Президентының матбугат хезмәте хәбәр итә.
“Ихлас күңелдән Сезне һәм тугандаш Татарстан халкын бәйрәм – Республика көне белән котлыйм, - диелгән телеграмма текстында. – Татарстан белән безнең багланышлар тирән тарихи һәм тугандаш элемтәләргә таянып, хезмәттәшлекнең барлык өлкәләрендә үсә бара. Сезгә һәм тугандаш Татарстан халкына иминлек һәм чәчәк атуны телим”.
Котлауларга Төркия чит ил эшләре министры Мәүлүт Чавашоглу кушылды. Ул Татарстан белән багланышларның Төркия һәм Россия арасында хезмәттәшлекне киңәйтүгә зур өлеш кертүен билгеләп үткән.