Төмәннең Ембай авылында унтугызынчы гасырда салынган мулла йортын төзекләндерәләр
Ембай авылы унҗиденче гасырда Төмәннән 20 чакрым ераклыкта Тура елгасы ярында урнашкан.
(Казан,28 июль, «Татар-информ»). Төмәннең Ембай авылында Том Сойер Фест волонтерлары унтугызынчы гасырда салынган мулла йортын төзекләндерәчәк. Бу хакта Бөтендөнья татар конгрессы матбугат хезмәте хәбәр итә.
Том Сойер Фест волонтерлары Төмәннең Ембай авылында урнашкан мулла йортын торгызуга акча җыя. Шулай ук өмәләрдә катнашып һәм төзелеш материаллары белән дә ярдәм итәргә була, диелгән хәбәрдә.
Быел үткәрелгән беренче өмәдә 16 кеше катнашкан. Волонтерларның яртысы - Төмәннән, калганнары - Ембай халкы.
Волонтерлар белдерүенчә, беренче чиратта, бинаның алга таба җимерелүен булдырмаска кирәк.
Ембай авылы унҗиденче гасырда ук Төмәннән 20 чакрым ераклыкта Тура елгасы ярында урнашкан. Авылга Бохара, Сәмәрканд, Ургенч, Хива һәм Урта Азиянең башка шәһәрләреннән килгән кешеләр нигез салган.