Татар дөньясы 23 ноябрь 2016 16:26

Түбән Новгород ягының Пильна районы татарлары милләтара дуслык турында фильм төшерә

Пильна районында эшләп килүче "Нур" Татар мәдәни үзәге Түбән Новгород өлкәсе хакимиятенең грантын откан.

Скопировать ссылку

(Казан, 23 ноябрь, “Татар-информ”) Түбән Новгород өлкәсенең Пильна районында эшләп килүче “Нур" татар социаль-мәдәни үзәге быел милләтара дуслык турында фильм төшерәчәк, дип хәбәр итә өлкәдә нәшер ителүче “Туган як” татар газетасы.

Әлеге Үзәк районның Петрякс, Сафаҗай, Яңа Мучали һәм Иске Мучали авыллары халкы тәкъдиме бу якларда яшәүче татарларның үзенчәлеген, телен, мәгарифен, гореф-гадәтләрен саклап калу максатыннан узган ел оештырылган иде. Аның җитәкчесе итеп район хакимиятенең оештыру-хокук идарәсе җитәкчесе Надирә Абдулганиева сайланды. Шушы үткән вакыт эчендә "Нур" үзәге районда инде ике тапкыр “Җәйге очрашулар” өлкә татар халык иҗаты фестивале уздырырга өлгерде.

Ә күптән түгел өлкә хакимиятенең “Түбән Новгород өлкәсендә милләтара мөнәсәбәтләрне гармонизацияләү” программасы кысаларында субсидия алды. Бәйгегә "Нур" үзәге “Бергә яшибез, тарихны бергә язабыз” дип исемләнгән проектын тәкъдим итеп, 150 мең сум грант отты. Бу акчага Пильна районында яшәүче халыклар – татар, рус, мордва һәм башка милләтләрнең тормышы, мәдәнияте, тарихы турында фильм төшерергә ниятләнелә. Фильм ел азагына кадәр әзер булачак, дип вәгъдә итә Надирә Абдулганиева.

#Түбән Новгород татарлары #Туган як газетасы

Сәхифәләр

Түбән Новгород ягының Пильна районы татарлары милләтара дуслык турында фильм төшерә