Түбән Каманың булачак журналистлары бала хокуклары турында видеолар төшергән
Иң яхшы ун ролик авторларына грамоталар һәм 20 мең сум күләмендә приз тапшырылачак.
(Казан, 23 октябрь, "Татар-информ"). Татарстанда "Бала хокук дөньясында" дип исемләнгән VI Республика мәгълүмати-социаль роликлар конкурсы башланды. Түбән Каманың "Поколение-Z" яшь журналист мәктәбе укучылары балаларның төп хокуклары турында видеолар төшергән. Бу турыда Түбән Кама муниципаль районы рәсми сайтында хәбәр ителә.
Конкурста 6 яшьтән алып 30 яшькә кадәрге балалар һәм яшьләр аерым-аерым да, төркемнәр яки иҗат коллективлары составында да катнаша ала.
Оештыручылар җәмәгатьчелек игътибарын бала мәнфәгатьләре, хокуклары һәм иминлеге мәсьәләләренә җәлеп итәргә тырыша. Видеороликлар жанрын катнашучылар үзләре сайлый: интервью, репортаж, видеоклип, мультфильм һ.б.
Иң яхшы ун ролик авторларына грамоталар һәм 20 мең сум күләмендә приз тапшырылачак.