Түбән Камада җитәкчеләр арасында чаңгы ярышлары үтәчәк
Быелгы ярыш "Түбән Кама нефтехим" предприятиесенең беренче җитәкчесе Николай Лемаевның 90 яшьлегенә багышланган.
(Казан, 14 март, "Татар-информ"). 16 мартта 10:00 сәгатьтә җитәкчеләр арасында "Алмаш2 укыту-тренировкалар ясау базасында "Түбән Кама нефтехим" призына чаңгы ярышы оештырыла. Быелгы ярыш предприятиенең беренче җитәкчесе Николай Лемаевның тууына 90 ел булуга багышланган. Бу турыда Түбән Кама муниципаль районы рәсми сайтында хәбәр ителә.
Ярышта катнашучы хатын-кыз җитәкчеләр - 2 км, ир-атлар 3 км ераклыкка узышачак.
17 март көнне исә 10, 20 һәм 30 км дистанцияләргә ел саен уздырыла торган чаңгы марафоны үтә. Җиңүчеләр медальләр, грамоталар һәм акчалата призлар белән бүләкләнәчәк.