Түбән Камада иң оста машина йөртүче хатын-кызны ачыкладылар
Өч җиңүче дә - автоинструкторлар.
(Казан, 6 август, "Татар-информ"). Түбән Камада "Автоледи-2019" конкурсы узды. Абсолют җиңүче булып Ольга Воронцова танылды. Бу турыда Түбән Кама муниципаль районы рәсми сайтында хәбәр ителә.
Икенче урында - Рәсимә Гайнуллова, өченчедә - Алия Хәкимҗанова. Аларның һәрберсенең мондый ярышларда катнашу тәҗрибәсе зур. Өч җиңүче дә - автоинструкторлар. Ольга - ДОСААФта, Рәсимә - "Автокласс"та укыта, Алия исә - "Автолидер" мәктәбе җитәкчесе.
Җиңүчеләр кубок һәм медальләрдән тыш, "акыллы" сәгать, ике урынлык палатка, автомобильчеләр өчен кирәк-ярак, өстәл теннисы өчен әйберләргә ия булды. "Эверест Авто" сервис үзәге кызлар өчен акчалата сертификатлар әзерләгән.
Иҗади конкурста җиңүче Айгөл Салиховага махсус бүләкне "Түбән Кама хатын-кызлары" оешмасы тапшырды.