Түбән Камада физик мөмкинлекләре чикләнгән кешеләр арасында җиңел атлетика буенча республика чемпионаты үтте
Зәйлеләр анда уңыш яулады
(Казан, 27 август, “Татар-информ”). Түбән Кама шәһәрендә физик мөмкинлекләре чикләнгән кешеләр арасында җиңел атлетика буенча республика чемпионаты үтте. Анда Зәйдән дә команда катнашты һәм уңышлары белән сөендерде, дип шатлык уртаклаша җирле “Зәй офыклары” басмасы.
Шул рәвешле, инвалидлар җәмгыяте рәисе Илдус Талипов һәм Антонида Николаева ядрә атуда беренче, ә Фәрит Латыйпов икенче урын алды. 800 метр арага йөгерүдә Әнисә Шәфиева – икенче, 100 һәм 800 метр араларга йөгерүдә, озынлыкка сикерүдә Лилия Кузьмина беренче булды. Ә төрле дистанцияләрдә йөгерүдә Рафаэль Гайсин, Ринат Гайфетдинов та сынатмады: алар өченче булып килде, дип яза газета.