Түбән Камада 62 яшьлек исерек ир-ат суда баткан
Фаҗига бүген «Автомобилист – 35» гараж-төзелеш кооперативы сулыгында булган.
(Казан, 3 август, «Татар-информ»). Татарстанның Түбән Кама районында буада 62 яшьлек исерек ир-ат баткан. Бу хакта “Татар-информ”га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
«Автомобилист – 35» гараж-төзелеш кооперативы буасында ир-ат батуы турындагы хәбәр ашыгыч хезмәтнең 112 номерына бүген 11.59 сәгатьтә килгән.
Өч дус сулык ярында Һава десанты гаскәрләре көнен бәйрәм иткән. Бер ир-ат коенырга уйлап суга сикергән, 10 метр йөзгәннән соң бата башлаган. Аның дуслары шунда ук коткаручыларны чакырган.
Һәлакәт урынына 6нчы зональ эзләү- коткару отряды хезмәткәрләре килгән һәм буа төбен тикшергән. Алар ярдан 15 метр ераклыкта ир-атның мәетен чыгарган.
