Свердловск өлкәсендә яшәүче укытучы Илһам Шакировның исемен мәңгеләштерергә өндәде
Сарманда туып, 41 ел Свердловск өлкәсендә балалар укыткан Фәния Гакәшина мәрхүм Илһам Шакировны “минем кодам” дип йөртә.
(Казан, 19 гыйнвар, “Татар-информ”, Данис Вахитов). Свердловск өлкәсендәге Кантуган авылында яшәүче татар теле укытучысы, Илһам Шакировның ерак туганы Фәния Гакәшина җырчының исемен мәңгеләштерергә өндәде. Ул, татар җәмәгатьчелегенә үзенең гозерен җиткерүне сорап, “Татар-информ” агентлыгына мөрәҗәгать итте.
- Татарстан һәм Россиянең халык җырчысы Илһам Шакиров 16 гыйнварда вафат булды. Ул 18 гыйнварда Казанның Яңа Бистә татар зиратында җирләнде.
Фәния Гакәшина татар халкының кайгысын уртаклашуын әйтте. “Илһам абыйның исемен мәңгеләштерү өчен, Әлфия Авзалова вафат булгач, аның истәлегенә уздырылган кебек үк чараларны уздырырга кирәк”, - диде ул.
“Ул иң моңлы татар җырчыларның берсе иде, җырлары мәңге истә калыр, Илһам кодам үзенең хезмәте өчен мәңгеләштерелергә тиеш”, - диде Фәния ханым.
Фәния Гакәшина апасының иренең әтисе Илһам Шакировның әтисе белән туган. Ул Илһам Шакировны “минем кодам” дип йөртә.
- Фәния Гакәшина Сарман районы Юлтимер авылында туган. Алабугада укытучы булырга укыгач, аны Сведловск өлкәсенә җибәргәннәр. 41 ел буе укыткан, директор булып та эшләгән, 1993 елда пенсиягә чыккан.