Свердловск өлкәсендә «Хәсән Замановның Алтын Йолдызы» китабы чыкты
Бөек Җиңүнең 75 еллыгына багышлап нәшер ителгән китапны тәкъдим итү чарасы көз көне булыр дип планлаштырыла.
(Казан, 28 июнь, «Татар-информ»). Татарстан Республикасы һәм Североуральск шәһәренең Бөек Җиңүнең 75 еллыгына багышланган уртак проекты кысаларында «Хәсән Замановның Алтын Йолдызы» китабы нәшер ителде. «Хәсән Замановның Алтын Йолдызы» китабын тәкъдим итү көзгә Североуральск шәһәрендә планлаштырылган. Бу хакта Татарстан Республикасының Свердловск өлкәсендәге Даими вәкиллеге хәбәр ителә.
25 июньдә Татарстан Республикасының Свердловск өлкәсендәге даими вәкиле Хәйдәр Гыйльфанов «Хәсән Замановның Алтын Йолдызы» китабы авторы Любовь Долматова һәм Советлар Союзы Герое Хәсән Замановның оныгы Шамил Солтанов белән очрашты.
Китап Татарстан Республикасында төзелгән, Екатеринбург шәһәрендә биткә салынган. Ул Североуральск шәһәре өчен рус телендә нәшер ителгән, анда герой истәлеге мәңгеләштерелгән.
Аның ике авторы бар: Татарстан язучысы һәм шагыйрә Әлфия Ситдыйкова — «Хәсән Заманов» дигән татарча китап авторы һәм Любовь Долматова — Североуральск шәһәр төбәгенең «Наше Слово» газетасының штаттан тыш хәбәрчесе. Авторлар Свердловск өлкәсенең татар авыллары мәктәпләре өчен китаплар комплектын тапшырдылар.
Китапны бастыруда Североуральск спонсорлары, шулай ук Татарстан Республикасының Свердловск өлкәсендәге Даими вәкиллеге партнерлары Васильян Миндияров һәм Риф Файдров ярдәм күрсәткән.
Советлар Союзы Герое Хәсән Заманов Татарстан Республикасының Актаныш районында туып-үскән, Бөек Ватан сугышыннан соң Североуральскида яшәгән һәм шунда җирләнгән.