Сурия Усманова: Бүгенге көндә якутларның 95 проценты үз телен белә
Татарстан Республикасы Язучылар берлеге бинасында «Татар телен саклап калу юллары бармы?» темасына түгәрәк өстәл оештырылды. Чарада катнашкан Татарстан Дәүләт Советының элекке депутаты, җәмәгать эшлеклесе Сурия Усманова телне саклау буенча якутларны үрнәк итеп китерде.
«Бүгенге көндә якутларның саны 500 меңгә якын. Шул ук вакытта 200 мең якутның, милли киемнәр киеп, меңнәрчә чакрым юллар үтеп, милли бәйрәмнәренә килгәннәренә бездә аптырыйлар һәм сокланалар.
Якутлар үзләренең рухларын саклады, төп проектлары гореф-гадәтләрне саклауга, милли аңны үстерүгә, тарихны белүгә юнәлдерелгән иде.
Бүгенге көндә якутларның 95 проценты үз телен белә. Без бит бер үк законнар нигезендә бер илдә яшибез…», – ди ул.
Сурия Усманованың түгәрәк өстәлдә әйткән фикерләрен «Интертат» сайты өчен Зилә Мөбәрәкшина язды.
