Приставлар махсус операциядә катнашучыларга карата 4 млрд сумлык производствоны туктаткан
Татарстанда махсус хәрби операция башланганнан бирле суд приставлары бурычы җыелган 16 мең кешегә карата кузгатылган 4 миллиард сумлык 63 мең башкарма производствоны туктаткан. Татарстан Республикасы баш суд приставы урынбасары Альберт Ибәтуллин «Татар-информ» агентлыгындагы матбугат конференциясендә шул хакта хәбәр итте.
«Шул исәптән, агымдагы ел башыннан без бурычы булган биш меңнән артык кешегә карата кузгатылган 800 миллион сумлык 12 мең башкарма производствоны туктаттык. Шулай ук, контракт төзүгә бәйле рәвештә, 5,5 меңнән артык кешегә карата кузгатылган 1,4 миллиард сумлык 19 мең башкарма производство туктатылды» - диде ул.
Ул моның алиментларга һәм сәламәтлеккә китерелгән зыян өчен түләүләргә кагылмавын билгеләп үтте.
«Закон бары тик кредит бурычларына гына кагыла. Алимент, шулай ук гомергә һәм сәламәтлеккә китерелгән зыянны каплау буенча йөкләмәләр исәптән алынмый», - дип өстәде ул.