Әстерханда «Татар гаиләсе» бәйгесе җиңүчеләре билгеле
Чараны «Ак калфак» һәм «Дуслык» татар мәдәнияте җәмгыятьләре Әстерхан көрәш һәм билбау көрәше федерациясе белән берлектә оештырды.
(Казан, 4 май, «Татар-информ»). 2 май көнне Әстерханда татар гаиләсе конкурсының финалы узды һәм җиңүче гаиләләр исеме билгеле булды. Бу хакта Бөтендөнья татар конгрессы матбугат хезмәте хәбәр итә.
Конкурста катнашучылар туган телне белүләрен күрсәтте, үзләре пешергән камыр ризыклары белән таныштырдылар һәм гаилә традицияләре турында сөйләделәр. Шулай ук татар халкының тарихын һәм мәдәнияте буенча викторинада катнаштылар. Берьюлы ике гаилә - Агаевлар һәм Насыйбуллиннар җиңүче булып танылды.
Чара ял базасында маевка форматында узды. Биредә яңа туган сабыйлардан алып 80 яшькә кадәрге кешеләр катнашты. Программада традицион халык чигеше буенча мастер-класслар, татар бизәкләрен буяу һәм башка бик күп нәрсәләр булды.
Көрәш ярышларында яшүсмерләр һәм балалар бик күп катнашты. Бүләкләү тантанасыннан соң татар көйләре белән бию флешмобы булды.
Чараны «Ак калфак» һәм «Дуслык» татар мәдәнияте җәмгыятьләре Әстерхан көрәш һәм билбау көрәше федерациясе белән берлектә оештырды, диелгән бу хәбәрдә.