Ставрополь крае губернаторы Корбан бәйрәмен ял көне итәргә тәкъдим итте
Ставрополь крае губернаторы Владимир Владимиров үзенең Телеграм-каналында төбәк территориясендә Корбан бәйрәмен эшләми торган көн итәргә тәкъдим итте.
«Ставрополье – күп милләтле һәм күп конфессияле край. Бездә төрле дин кешеләре яши, һәм без бер–беребезнең традицияләренә хөрмәт белән карыйбыз», – дип билгеләп үтте төбәк җитәкчесе.
Владимиров искәрткәнчә, православлар еш кына Радоницаны каршы алганнар, ул край законнары буенча инде күп еллар ял көне булып тора.
«Корбан бәйрәмендә ял итү гадел булачак. Әмма карарны безнең төбәк халкының фикерен исәпкә алып кына кабул итәчәкбез. Хөрмәтле якташлар, сездән аны белдерүегезне сорыйм», - дип ассызыклады губернатор.
Тиешле сораштыруны Владимиров Дәүләт хезмәтләре федераль порталы платформасында урнаштырды. Халык тавыш бирүендә Ставропольдә яшәүчеләр генә катнаша ала, ул 10 майга кадәр дәвам итәчәк.
Корбан бәйрәме быел 27 майда билгеләп үтелә. Бу көн Россиянең сигез республикасында эшләми торган көн булачак. Татарстаннан тыш, сүз Адыгея, Башкортстан, Дагыстан, Ингушетия, Кабарда-Балкария, Карачай-Черкес һәм Чечня кебек төбәкләр турында бара. Шул ук вакытта Кырым Республикасында Корбан бәйрәме уңаеннан 29 май ял көне булачак.