Яшел Үзәннең Осиново бистәсендә Татарстан Президенты карары буенча спорт зал төзелә
Ике катлы бинаның мәйданы 12 мең кв. метрдан артык тәшкил итә.
(Казан, 16 октябрь, «Татар-информ»). Яшел Үзәннең Осиново бистәсендә Татарстан Президенты карары буенча төзелә торган спорт залда эшләр ноябрьдә тәмамланачак. Бу турыда республиканың Дәүләт төзелеше күзәтчелеге инспекциясе матбугат хезмәте хәбәр итә.
Республикада мондый универсаль спорт объектлары Сарман, Мамадыш, Буа, Яшел Үзән, Кукмара һәм Тукай районнарында булачак. Бүген республиканың Дәүләт төзелеше күзәтчелеге инспекциясе инспекторлары Яшел Үзән районы Осиново бистәсендәге спорт корылмасын карадылар.
«Хәзерге вакытта объектта төзелеш-монтажлау эшләре, тышкы һәм эчке инженер-техник челтәрләр урнаштыру, территорияне төзекләндерү эшләре бара», диелгән хәбәрдә.
Спорт залда баскетбол, волейбол һәм мини-футбол уйнап булачак. Спорт залда киенү-чишенү бүлмәләре, душ бүлмәсе, шулай ук тренажерлар өчен мәйданчык бар.
Ике катлы бинаның мәйданы 12 025 кв. метр тәшкил итә.