Данис Зариповның улы быелгы сезонда «Ирбис» командасы өчен беренче матчын үткәрде
17 яшьлек Артур Зарипов Канададан (ул анда Көнчыгыш Онтарио яшьләр лигасында бер сезон үткәрде) кайтканнан соң беренче тапкыр Казан клубында чыгыш ясады.
(Казан, 15 ноябрь, «Татар-информ»). «Ак Барс» капитаны Данис Зариповның улы Артур Зарипов бүген 2020/2021 елгы сезонда Яшьләр хоккей лигасы чемпионатында «Ирбис» хоккей клубы өчен тәүге матчын үткәрде.
Артур Яшьләр хоккей лигасының даими чемпионатында Казанда узган матчта «Омские ястребы» клубына каршы уенда бозга чыкты. Очрашу «Татнефть Арена» бозында узды: өч периодтан соң исәп 1:1 булды, овертаймда исә кунаклар үзләренә җиңү китергән алканы кертте – 2:1.
Үзенең беренче булган рәсми матчта уйнаучы улының уенын күзәтү өчен стадионга «Ак Барс»ның капитаны Данис Зарипов та килде, ул әлеге уенга килгән 117 тамашачының берсе булды.
Кызганыч ки, Артур Зарипов бу очрашуда әтисенең өметен акламады һәм нәтиҗәле баллар туплый алмады. Ул Максим Цаплин һәм Илья Черников белән бергә дүртенче өчлектә уйнады. Бу матчта аны кагыйдә бозган өчен ике мәртәбә уеннан чыгардылар.
«Ирбис» командасы Яшьләр хоккей лигасының Көнчыгыш конференциясендә беренче урынны били: аның 23 матчтан соң 36 очкосы бар.
Шунысын да искәртик: Артур Зарипов (быелның декабрендә аңа 18 яшь тула) ике көн элек Казанның «Ак Барс» клубы белән ике еллык килешү төзеде.