В.Леонов:“Универсиада өчен заманча техника белән җиһазланган Матбугат үзәге төзергә кирәк”

Әлегә аның урыны тәгаенләнмәгән
(Казан, 13 апрель, “Татар-информ”, Айгөл Фәхретдинова). Студентларның 2013 елда Казанда узачак җәйге Универсиадасы барышын 1,5 меңнән 3 меңгә кадәр каләм иясе яктыртыр дип көтелә. Аларга эшләр өчен Татарстан башкаласында нинди шартлар тудырылачак, махсус Матбугат үзәге төзелерме?
“2013 елгы Универсиада дирекциясе” директоры Владимир Леонов белдергәнчә, бу халыкара чараның уңышлы узуы һәм объектив яктыртылуы, иң беренче чиратта, журналистлар өчен уңайлы шартлар тудырылуга бәйле булачак. Шуңа күрә яңа спорт биналарында комментаторлар, конференцияләр уздыру, он-лайн трансляцияләр оештыру өчен махсус заллар булдыру зарур. Ә “Татнефть Арена”, “Баскет холл” кебек гамәлдәге корылмалардагы заллар модернизацияләнәчәк.
“Казанның 1000 еллыгында Матбугат үзәге Спорт сараенда урнаштырылган иде. Бу юлы бина өстәл теннисы ярышлары өчен файдаланылачак. Универсиада өчен заманча үрнәктәге техника белән җиһазланган Матбугат үзәге төзергә кирәк булачак. Хәзер төзелеш өчен берничә урын карала. Корылманың проектын эшләүгә чит ил белгечләре дә җәлеп ителәчәк. Ул эш урыннарыннан тыш, брифинглар уздыру, ял, туклану залларын эченә алырга тиеш”, -дип белдерде дирекция җитәкчесе.