Түбән Камада яшьләр өчен экстрим-парк төзеләчәк
Бүген экстрим-парк проекты турында фикер алыштылар.
(Казан, 12 август, «Татар-информ»). Түбән Каманың «Ковер» үзәгендә 2021 елда шәһәрнең «Кояшлы алан» паркында төзеләчәк экстрим-парк проекты турында фикер алыштылар. Бу турыда Түбән Кама муниципаль районы рәсми сайтында хәбәр ителә.
«Безнең бу этапка җитүебез һәм барыбыз, аеруча, яшьләр күптән көтә торган экстрим-паркның нинди булачагы турында фикер алыша башлавыбыз бик яхшы», — дип мөрәҗәгать итте очрашу башында Түбән Кама мэры Айдар Метшин.
Архитектор Эмиль Сираҗетдинов һәм Legato Sports Architecture командасына (Мәскәү, Таллин, Куала Лумпур, Казан һәм башка шәһәрләрдә скейт-парклар төзүчеләр) Түбән Кама яшьләре үз тәкъдимнәрен җиткерде.
«Минемчә, барысы да килеп чыгарга тиеш. Бу проект белән тәҗрибәле кешеләр шөгыльләнә, шәһәр башлыгы сезнең янәшәдә һәм сезнең омтылышыгызны уртаклаша», — дип билгеләп үтте бүгенге көндә Түбән Камада эш сәфәрендә булган Федерация Советы әгъзасы Олег Морозов.
Яшьләр эшләре идарәсе җитәкчесе Айгөл Аитова да очрашудан канәгать калуын җиткерде.