Универсиадада Россиянең футбол буенча җыелмасы Кытай командасын җиңде

Матчның 66 нчы минутында хисапны “Рубин” һөҗүмчесе Владимир Дядюн ачты

 (Казан, 10 июль, “Татар-информ”, Илдар Райманов). 2013 ел Универсиадасында Россиянең футбол буенча җыелма командасы Кытайның студентлар илкүләм командасын җиңде. Игорь Шалимов карамагындагылар төркем этабы матчында 66 нчы минутта гына хисапны “Рубин” һөҗүмчесе Владимир Дядюн ача алды һәм ул керткән туп Универсиаданың Социаль шәһәрчектәге төп стадионы трибуналарын алкышлар белән шартларга җиткерде. Россиялеләр өстенлекне саклый килеп, матч тәмамланыр алдыннан исәпне икеләтә арттыра алды: уенның 90 нчы минутында Безлихонтов таблода 2:0 саннары чыгуга иреште.

Россиялеләр 2 җиңү нәтиҗәсе буенча үз төркемнәрендә мөмкин булган 9 очконың 6сын җыеп, 1 нче урынга чыкты, шул рәвешле, 12 июльдә булачак чирек финалда Россиянең футбол буенча җыелмасы Канада илкүләм командасы белән кырда көч сынашачак.

Универсиада. “А” төркеме
III тур

Россия – Кытай – 2:0 (0:0)
Голлар: 1:0 – Дядюн (66), 2:0 – Безлихотнов (90).
Россия: Кобозев, Устинов, Никитин, Зуев, Голубев, Васильев, Фомин, Никифоров, Чочиев, Войнов, Дядюн.