“Ак Барс” яңа елда үз бозында тәүге матчын үткәрә

(Казан, 8 гыйнвар, “Татар-информ”). Бүген Казанның “Ак Барс” хоккейчылары яңа, 2008 елда Россия чемпионаты кысаларында тәүге матчын үткәрә.
Континенталь Кубок ияләре “Татнефть-арена” бозында Чиләбенең “Трактор” командасын кабул итәчәк. Матч 17.00 сәгатьтә башлана. Очрашуга Мәскәү судьялары Сергей Семенов, Виктор Бирин, Алексей Медведев хезмәт күрсәтәчәк.
Ил чемпионаты кысаларында көндәшләр 51 тапкыр очрашты: казанлылар активында -20 җиңү, 7 ничья һәм 24 оттырыш (алкалар аремасы139-188), дип хәбәр итә “Ак Барс” клубының матбугат хезмәте. Быелгы сезонда “Ак Барс” ике матчта да җиңүгә иреште: Казанда узган очрашу “барслар” файдасына – 5:4, ә Чиләбедә үткәне 4:2 исәбенә тәмамланды.
Хәзер “Ак Барс” ил чемпионаты турнир таблицасының – 7нче, ә “Трактор” 14нче баскычын били.
“Трактор” Суперлиганың иң яшь клубларыннан берсе. Команда составында даими рәвештә 20 яшькә җитмәгән 8 уенчы чыгыш ясый. Хоккейчыларның бары тик дүртесе генә 30 яшьтән өлкәнрәк.