Алинә Заһитова Россия җыелма командасы тренировкаларына 2 июньдә кушылачак

25 майда Новогорскида илнең Олимпия җыелма командасы коронавирус пандемиясе шартларында эшне яңадан башлап җибәрде.

(Казан, 1 июнь, «Татар-информ»). Фигуралы шуу буенча 2018 елгы Олимпия чемпионы Алинә Заһитова иртәгә Россия җыелма командасы тренировкаларына кушылачак. 2 июньдә фигуралы шуу остасы Мәскәү өлкәсендә урнашкан Новогорскига киләчәк. Анда шул ук исемдәге укыту-тренировка үзәгендә җыелма команда составында шөгыльләнәчәк. Бу хакта РИА Новости хәбәр итә.

25 майда Новогорскида илнең Олимпия җыелма командасы коронавирус пандемиясе шартларында эшне яңадан башлап җибәрде. Үзәктә Россиянең төп һәм юниорлар җыелма командалары составына керүче Этери Тутеридзе төркеменең барлык фигуристлары эшли.

Исегезгә төшерәбез, Алинә Заһитова үз-үзеңне изоляцияләү чорында Казанда булды. Аннары ул Ижевскига китте. Анда ул 18 яшьлеген билгеләп үтте һәм машина йөртү таныклыгын алды.