Сәясәт 21 сентябрь 2023 20:46

Сөләйманов Татарстан Рәисе юлламасы турында: «Беренчеләр хәрәкәте»нә җаваплылык йөкләнә

Скопировать ссылку

«Беренчеләр хәрәкәте»нә зур җаваплылык йөкләнгән. Әлеге хәрәкәтнең Татарстандагы җитәкчесе Тимур Сөләйманов, ТР Рәисе Рөстәм Миңнехановның республика Дәүләт Советына юлламасын шәрехләп, шундый фикере белән уртаклашты.

«Хәрәкәткә чыннан да зур җаваплылык йөкләнгән һәм без аңа әзер. Мәктәпләр һәм махсус урта уку йортлары мөгаллимнәре, балалар бакчалары тәрбиячеләре, район хакимиятләре, төрле министрлык һәм ведомстволардагы коллегалар белән төрле дәрәҗәдә зур эш башлыйбыз», - дип язган ул telegram-каналында.

Сөләйманов республика Рәисе сүзләреннән өзек китергән, Миңнеханов анда түбәндәге сүзләр белән «Беренчеләр хәрәкәте»нә барлык дәрәҗәдәге җитәкчеләрнең игътибарын юнәлтә: «Монда формальлеккә юл куярга ярамый. Үсеп килүче буынны тәрбияләүгә карата эчкерсез мөнәсәбәт кенә безнең барыбызга да киләчәккә ышаныч белән карарга мөмкинлек бирәчәк».

«Беренчеләр хәрәкәте» җитәкчесе тагын да күбрәк мөмкинлекләр тудыру киләсе елның һичсүзсез өстенлеге булачагына игътибар юнәлтте, алар яшьләргә үзләрен күрсәтергә мөмкинлек бирәчәк.

«2024 елның республикабызда Фәнни-технологик үсеш елы булачагын да искә алыйк – әлеге юнәлештә проектлар һәм мөмкинлекләргә тагын да зуррак игътибар бирәчәкбез. Әйтик, инде быел ук җирле бүлекләр, шулай ук Хәрәкәт клублары базасында фәнни клублар ачу эшенә керешәчәкбез», - дип сүзен төгәлләде Сөләйманов.

#Тимур Сөләйманов #Рөстәм Миңнеханов #еллык юллама

Сәхифәләр

Сөләйманов Татарстан Рәисе юлламасы турында: «Беренчеләр хәрәкәте»нә җаваплылык йөкләнә