Казанда вирус куркынычы булганда күп тапкыр файдаланыла торган комбинезон теккәннәр
Комбинезонны сертификацияләүне ике атна эчендә төгәлләргә ниятлиләр.
(Казан, 31 март, «Татар-информ», Диана Авакян). Казан химия фәнни-тикшеренү институтында 20 тапкыр файдаланып була торган вируска каршы комбинезон теккәннәр. Бу хакта «Татар-информ» агентлыгына «Ростех» Дәүләт корпорациясеннән хәбәр иттеләр.
«Коронавирус эпидемиясе фонында предприятие бик тиз мобильләште һәм булган базага, техник карарларга таянып, вируска каршы комбинезон әзерләде», — дип белдерделәр компаниядә. Костюмның инновацион материалы бик нык булуы белән аерылып тора — ул озак вакыт файдалануга да карамастан, ышкылмый һәм ертылмый.
Комбинезон табиблар, хезмәт күрсәтү секторы һәм махсус хезмәтләрдә эшләүчеләргә исәпләнгән. «Костюмны физик затлар да сатып алырга мөмкин: аларны ваклап сәүдә итү челтәрләрендә табып булачак», — дип искәрттеләр корпорациядә. Комбинезонның бәясе ике мең сум тирәсе тәшкил итәчәк.
Комбинезонны сертификацияләүне ике атна эчендә төгәлләргә ниятлиләр.