Алабугада Кәлимуллиннар гаиләсе шәһәргә 17 метрлы чыршы бүләк иткән

Бу чыршыны алар 25 ел элек өйләре янына утырып үстергән булган.

(Казан, 29 ноябрь, "Татар-информ", Гөлнара Салихова). Бүген Алабуга шәһәренең Мәдәният йорты янында Яңа елның төп билгесе – чыршы урнаштырылды. 17 метрлы чыршыны Светлана һәм Фәндәс Кәлимуллиннар гаиләсе шәһәргә бүләк итте.

“Без тумышыбыз белән Башкортстаннан. Озак еллар инде Алабугада үз йортыбыз белән яшибез. Бервакыт кечкенә генә чыршы алып кайтып, ишегалдына утырткан идек. Аларның берсе пихта, икенчесе чыршы булып чыкты. Бүген аларга 25 ел. Алабуга халкына Яңа ел кәефен бүләк итәсебез килде. Безнең чыршыбыз бик матур, күркәләре күп, нәкъ әкияттәгечә”, – дип сөйләде Светлана Кәлимуллина.