Җәмгыять 29 июнь 2020 18:32

Россиядә халык санын исәпкә алу 2021 елның апреленә күчерелә

Халык санын алу 2020 елның октябрендә узарга тиеш иде.

Скопировать ссылку

(Казан, 29 июнь, «Татар-информ»). Бөтенроссия халык санын алу 2021 елның апрелендә узачак, әмма кыенлыклар булган территорияләрдә эшне 2020 елның октябрендә башлаячаклар. Бу хакта РИА Новости агентлыгын Росстат башлыгы Павел Малковка сылтама белән хәбәр итте.

«Халык санын алу 2020 елның октябрендә планлаштырылган иде. Коронавирус инфекциясе эпидемиясе таралуга бәйле рәвештә, 2021 елның апреленә күчерү турында карар кабул ителде. Чараның төп өлеше 2021 елның апрелендә узачак. Бару буенча кыенлыклар булган урыннарда халык санын алу 2020 елның октябрендә башланачак», — диде Малков.

Аның сүзләренә караганда, вакыт моның «нигезле карар» булганлыгын күрсәткән. «Безнең өчен төп өстенлек — гражданнар сәламәтлеге», — дип искәртә Малков.

Бөтенроссия халык санын алу беренче тапкыр күп каналлы форматта узачак. Россиядә яшәүче һәр кеше үзен һәм үз гаиләсен дәүләт хезмәтләре порталында мөстәкыйль рәвештә яза ала.

Әлеге чарада күп функцияле үзәкләрдә яки стационар исәпкә алу участокларына килеп тә катнашып булачак. Йортлар буенча 315 мең исәпкә алучы һәм 45 мең кыр контролеры йөриячәк, алар үз эшләрендә электрон планшетлардан файдаланачак.

#Халык санын алу #җанисәп

Сәхифәләр

Россиядә халык санын исәпкә алу 2021 елның апреленә күчерелә