Татарстанның күп функцияле үзәкләрендә эш башланганнан бирле 90 мең кеше язылган

Хәзер күп функцияле үзәктә 103 хезмәт алырга мөмкин.

(Казан, 29 апрель, «Татар-информ»). Татарстанның күп функцияле үзәкләренә эш башлаганнан бирле белгечләргә кабул итүгә 90 мең кеше язылган. Ике атна эчендә 85 мең хезмәт күрсәтелгән. Бу хакта күп функцияле үзәк матбугат хезмәте хәбәр итә.

«Хәзер күп функцияле үзәктә 103 хезмәт алырга мөмкин. Аларның күбесе электрон рәвештә күрсәтелми», — дип билгеләп үтелә хәбәрдә.

Хәзерге вакытта татарстанлыларда күчемсез милекне рәсмиләштерү, ЕСИАда хисап язмасын раслау, яшәү урыны буенча теркәү, ЕГРНнан белешмәләр бирү, Россия паспортын алу, шулай ук муниципаль хезмәтләргә ихтыяҗ аеруча зур.

Күп функцияле үзәктә Казан Башкарма комитеты белән килешү буенча күрсәтелә торган 46 муниципаль хезмәтнең 28ен ТР Дәүләт хезмәтләре порталы аша алырга, шул исәптән төзелеш башлану яки тәмамлану турында хәбәр бирергә мөмкин.

Татарстан күп функцияле үзәк 13 апрельдән килүчеләрне кабул итүне яңадан башлап җибәрде.