Татар конгрессы «Авылым чишмәсе» бәйгесе турында игълан итте
Конкурста катнашу өчен инстаграмда фотолар, яисә видео урнаштыру, мәгълүмат бирү яки инша язу кирәк була.
(Казан, 27 август, «Татар-информ»). Бөтендөнья татар конгрессы, «Татарлар газетасы» «Авылым чишмәсе» дип исемләнгән конкурс оештыра.
Татар конгрессының матбугат хезмәте хәбәр иткәнчә, бәйгенең максаты — татар авылларындагы чишмәләрне саклау һәм аларның төзеклеген күрсәтү. Авылларда яшәүче тырыш кешеләрне, булдыклы эшмәкәрләрен, игелекле меценатларын үрнәк итеп, аларның изге гамәлләрен барлау.
Конкурс ике номинация буенча үткәрелә: инстаграмда фотолар, яисә видео урнаштыру, мәгълүмат бирү һәм инша язу. Һәр номинация буенча беренче, икенче, өченче урыннар һәм конкурсның Гран-при иясе билгеләнәчәк.
Бәйгедә 18 яшьтән өлкәнрәк булган, Татарстан, Россия һәм чит илләрдә яшәүче һәркем катнаша ала. «Авылым чишмәсе» конкурсына старт 30 августта биреләчәк, диелә хәбәрдә.