Телләр турындагы законны тормышка ашыру өчен яңа программа эшләргә тәкъдим ителә

Татарстан парламенты телләрне саклау нисбәтеннән махсус карар кабул итте
(Казан, 27 июнь, “Татар-информ”, Римма Гатина). Бүген өченче чакырылыштагы ТР Дәүләт Советының 39 нче утырышында “ТР дәүләт телләре һәм Татарстан Республикасында башка телләр турында” ТР Законы һәм 2004-2013 елларга ТР дәүләт телләрен һәм Татарстан Республикасында башка телләрне саклау, өйрәнү һәм үстерү буенча ТР Дәүләт программасын гамәлгә ашыру турында мәгълүматы тыңланды. Әлеге мәсьәлә буенча ТР Премьер-министры урынбасары - мәдәният министры Зилә Вәлиева чыгыш ясады.
Фикер алышулардан соң ТР Дәүләт Советы бу мәгълүмат буенча карар кабул итте. ТР Дәүләт Советы Рәисе Фәрит Мөхәммәтшин бүген күтәрелгән мәсьәләнең уйга салуын һәм аның бик тә гади булмавын билгеләп үтте.
Спикер бүген фикер алышулар вакытында яңгыраган тәкъдимнәрне, республикадагы үзгәрешләрне исәпкә алып, Телләр турындагы законны тормышка ашыру буенча программаның яңа редакциясен эшләргә тәкъдим итте. Әлеге программаны Хөкүмәткә агымдагы елның 1 нче октябренә кадәр эшләп кертергә киңәш ителде. Ф. Мөхәммәтшин фикеренчә, әлеге программа чынбарлыкны чагылдырырга һәм татар, рус телләрен өйрәнүгә этәргеч бирергә тиеш.