Башкортстанда Чыңгыз Айтматовны хөрмәтләп искә алалар

Кыргыз халкының асыл улы, күренекле әдип Чыңгыз Айтматовның вафаты уңаеннан, Башкортстан матубгат басмалары төрле шәхесләрнең хатирәләрен урнаштыра
(Уфа, 27 июнь, “Татар-информ”, Фәнис Фәтхуллин). Кыргыз халкының асыл улы, күренекле әдип Чыңгыз Айтматовның вафаты уңаеннан, Башкортстан матубгат басмалары төрле шәхесләрнең хатирәләрен урнаштыра.
Республикада татар телендә чыгучы “Кызыл таң” газетасы да үзенең чираттагы санында бөек язучыга багышланган өч язманы бастырган. Танылган мөгаллим, филология фәннәре кандидаты Сәгыйдулла Хафизов “Кабатланмас заманның бөек улы” дип исемләнгән язмасында Чыңгыз Айтматовның талантлы иҗатына күзәтү ясый, үзенең кызыклы фикерләре белән уртаклаша. Атаклы язучының әнисе, татар кызы Нәгыймә Хаҗи кызы хакында да мәгълүмат бирә автор.
Газетадагы икенче язманы танылган шагыйрь Равил Шаммас әзерләгән. Аның мәкаләсе “Мин татарча аңлыйм, диде Чыңгыз абый” дип атала. Автор Переделкинодагы иҗат йортында Башкортстан әдипләренең һәм шул исәптән үзенең дә Чыңгыз Айтматов белән кызыклы очрашулары, мәҗлес артында ихлас аралашулары, әдәбият, иҗат турында фикер алышулары хакында җылы хатирәләре белән уртаклаша.
Уфадан Ирек Хәбибуллин дигән автор да үзенең Кыргызстанда эшләгән елларында Чыңгыз Айтматовның тормышы, аның Бишкәктәге (элекке Фрунзе шәһәре) терлекчелек фәнни-тикшеренү иниститутының кече гыйльми хезмәткәре булып эшләгән чоры хакында мәгълүматларын яза.