Әлмәттә мәктәп укучыларын этикет кагыйдәләренә өйрәтәчәкләр

Бу — яшүсмерләр клублары һәм шәһәр мәктәпләре белән берлектә сынау проекты.

(Әлмәт, 26 март, «Татар-информ», «Әлмәт таңнары»). Әлмәт шәһәрендә «Кечкенә яшьтән этикет» дигән махсус проект эшли башлады.

Этикет дәресләре Габдулла Тукай исемендәге үзәк балалар китапханәсендә узачак. Нәкъ менә биредә кызыклы форматта концертлар, тренинглар, квестлар үткәрү мөмкинлеге бар. Китапханәдә үз-үзеңне тоту кагыйдәләре буенча бик күп китаплар җыелган, шулай ук тиздән аш-су студиясе ачылачак.

 Бу — яшүсмерләр клублары һәм шәһәр мәктәпләре белән берлектә сынау проекты. Барлык балалар китапханәләре дә анда катнашачак.

Бер дәрес эчендә үз-үзеңне тоту культурасына өйрәтү, балада этик дәрәҗә формалаштыру мөмкин түгел. Шуңа күрә оештыручылар «Кечкенә яшьтән этикет» проекты дәвамлы булачак, дип вәгъдә итә. Алар этикет кагыйдәләрен бөтен бер буынны өйрәтү максатын куйган.