Мамадыш депутаты күп балалы гаиләнең 60 мең сум бурычын түләгән

Җирлек башлыгы Вәлия Гыйззәтуллина сүзләренчә, соңгы елларда депутатлар авыл халкының проблемаларын хәл итәргә актив  ярдәм итәләр.

(Казан, 26 февраль, «Татар-информ»). Мамадыш районының Кызыл Тау авыл җирлеге депутаты Артем Рыжков күп балалы гаиләнең торак-коммуналь хезмәтләр өчен 60 мең сум бурычын түләгән.

Парламентарий сүзләренчә, әни кеше өч баланы бер үзе үстерә, аларның берсе инвалид, әтиләре юк. Инвалид баласы булгач ана кеше эшли алмый. Бу турыда «Нократ» газетасы яза.

«Аның бурычы түләнеп бетте. Хәзер дә аңа булышып торам», — диде парламентарий Мамадыш районының иң зур авыл җирлегендә узган гражданнар җыенында.

Җирлек башлыгы Вәлия Гыйззәтуллина сүзләренчә, соңгы елларда депутатлар авыл халкының проблемаларын хәл итәргә актив ярдәм итәләр.

Соңгы елларда Кызыл Тау авыл җирлегендә юлларга асфальт җәелде, тротуар ясалды, урамга яктырткыч куелды, балалар бакчалары ремонтланды.