Кайбычта 9 ай эчендә җинаятьләр саны 11 очракка кимегән

Әмма аеруча катлаулы җинаятьләр саны арткан

(Казан, 24 октябрь, “Татар-информ”, Роза Исмәгыйлова). Узган тугыз айда Кайбыч муниципаль районында җинаятьләр саны унбергә кимегән, әмма аеруча катлаулы җинаятьләр саны арткан, дип хәбәр итә “Кайбыч таңнары” газетасы.
Әлеге саннар узган елның шушы чоры күрсәткече белән чагыштырып бирелә. Россия Эчке эшләр министрлыгының “Апас” районара эчке эшләр бүлегенең “Кайбыч” полиция бүлекчәсе башлыгы Рушан Хуҗин бу хакта оператив киңәшмәдә хәбәр итте. Үтерү очраклары – икегә, көчләүләр – бергә артыграк теркәлгән, сәламәтлеккә аңлы рәвештә зыян китерү 2дән 4кә, склад, база, кибет һәм башка сәүдә нокталарыннан урлашулар 4тән 6га арткан. Җинаятьләрне ачу күрсәткече 86,2 процент тәшкил итә, бу 8,6 процентка күбрәк. Шулай ук ачылган җинаятьләр саны 22гә, исерек килеш кылынган җинаятьләр 4кә арткан.