ТРда җиңел таксиларга йөк һәм пассажир ташырга 9,5 мең рөхсәт кәгазе бирелгән

Кызгылт сары төстәге фонарьнең, “шашка” тамгасының һәм оешма турында мәгълүматның булуына аерым игътибар бирелә

 (Казан, 24 июнь, «Татар-информ»). ТРда җиңел таксиларга йөк һәм пассажир ташырга 9,5 мең рөхсәт кәгазе бирелгән. Кызгылт сары төстәге фонарьнең, “шашка” тамгасының һәм оешма турында мәгълүматның булуына аерым игътибар бирелә, дип хәбәр итә ТР Транспорт һәм юл хуҗалыгы министрлыгы матбугат хезмәте.

24 нче июньгә республикада җиңел таксиларга йөк һәм пассажир ташырга 9537 рөхсәт бирелгән. Рөхсәт бирү турында гаризалар ТР Транспорт һәм юл хуҗалыгы министрлыгында сишәмбе һәм җомга көннәрендә кабул ителә.

Рөхсәт кәгазьләре чәршәмбе һәм җомга көннәрендә бирелә. Бу көннәрдә транспорт чаралары тикшерелә. Белгечләр җиңел таксиларның түбәләрендә кызгылт сары төстәге фонарьнең, “шашка” тамгасының һәм оешма турында мәгълүматның булуына аерым игътибар бирәләр.