Казанда юл катламын саклау өчен урамнарга көн саен су сибәләр

Артык югары температура да юл өслегенең җимерелүенә һәм асфальтта ярыклар барлыкка килүгә китерергә мөмкин.

(Казан, 23 июнь, «Татар-информ»). Юлларны ярылып китүдән саклау өчен, Казан юл хезмәтләре эссе көннәрдә урамнарга көн саен су сибә.

Артык югары температура да юл өслегенең җимерелүенә һәм асфальтта ярыклар барлыкка килүгә китерергә мөмкин. Һава температурасы төшкәнче юлларга су сибү дәвам итәчәк. Бу хакта Татарстан башкаласының матбугат хезмәте хәбәр итә.

Юл өслеген саклау өчен һава температура +25 градустан югары булганда 11.00-15.00 сәгатьләрдә су сибәләр. Беренче чиратта, бу эш хәрәкәт күп булган урамнарда үткәрелә.

Шулай ук яшеллекләргә — агач, куак һәм клумбаларга даими су сибәләр. Һәр көн саен туксанга кадәр су сибү машинасы эшли.

Бу чаралар белән бергә юлларда дымлы чистарту эшләрен үткәрә. Алар транспорт хәрәкәтенә комачауламау өчен кичке сәгать унбердән иртәнге сәгать алтыга кадәр эшли.