Чирмешәндә республика программасы буенча алты ишегалдын төзекләндерделәр

«Безнең ишегалды» программасы киләсе елда да дәвам итәчәк.

(Казан, 21 сентябрь, «Татар-информ»). Быел «Безнең ишегалды» республика программасы ярдәмендә Чирмешәндә алты күп фатирлы торак ишегалды территориясен төзекләндерделәр. 2020 елда бу программага Совет урамындагы 36, 38, 40, 42, 44, 48 йорт кергән. Бу турыда «Наш Черемшан» газетасы яза.

«Чирмешән» торак милекчеләре ширкәте идарәсе рәисе Мәсхүт Хөсәенов сүзләренчә, ишегалдында беренче чиратта юлларны ремонтлаганнар һәм асфальт җәйгәннәр.

Ишегалларында әле эшләр төгәлләнмәгән. Биредә кер киптерү урыны, чүп савытлары һәм кече архитектура формалары булачак.

«Безнең ишегалды» программасы киләсе елда да дәвам итәчәк, район үзәгендә тагын алты йорт ишегалды тәртипкә китереләчәк.