Башкортстанда Мостай Кәримне искә алу чаралары башланды

(Уфа, 20 октябрь, “Татар-информ”, Фәнис Фәтхуллин). Башкортстанның халык шагыйре Мостай Кәримнең тууына 89 ел тулды.
Шушы уңайдан Уфада һәм аның туган ягы Чишмә районында истәлек чаралары башланып китте. Бүген Уфада укучы талипларга Мостай Кәрим исемендәге стипендияләрне һәм премияләрне тапшыру тантаналары уза. Республика театрлары исә бу көннәрдә тамашачыларга Мостай Кәрим әсәрләре нигезендә сәхнәләштерелгән спектакльләрне тәкүдим итә.
Халкыбызның атаклы әдибе, өч ел элек, үзенең 86 яшьлек туган көненә бер ай калганда, арабыздан киткән иде. Башкорт әдәбияты үсешенә зур өлеш керткән талант иясенең исемен мәңгеләштерү буенча, узган өч ел эчендә, Башкортстанда байтак эшләр башкарылды да инде. Уфадагы элекке Социалистик урамы хәзер халык шагыйре исемен йөртә. Шулай ук Уфадагы Милли яшьләр театрына да Мостай Кәрим исеме бирелде. Аннан башкаладагы яңа төзелгән 158 нче башкорт гимназиясенә дә халык шагыйре исеме кушылды.
Былтыр исә Мостай Кәрим хакындагы истәлекләр кергән “Мостайсыз үткән бер ел” дип исемләнгән китап нәшер ителде. Бу китапны халык шагыйренең Мәскәүдә яшәүче улы, шулай ук язучы һәм тәрҗемәче булган Илгиз әфәнде әзерләп бастырган.
Мостай Кәрим туып үскән Чишмә районы үзәге Чишмә поселогындагы бер урам да узган елдан алып аның исемен йөртә. Әле халык шагыйренең әсәрләренең тулы җыентыгын чыгару, туган авылы Келәштә аның йорт-музеен төзү хәстәрлекләре башлана.
Келәш авылындагы ул йорт-музей утары үзенең зурлыгы белән аерылып торачак. 15 гектар җирне били аңа бүленгән биләмәләр. Биредә тулы бер комплекс төзү өчен, архитекторлар арасында конкурс игълан ителгән иде. Шушы көннәрдә бу бәйгедә җиңеп чыгучылар мәгълүм булды. Шушы үзенчәлекле утарны төзү хокугын Уфадагы “Архпроект” ширкәте белгечләре алган.