Инстаграмда «Казан Арена»ның ялган аккаунтына язылган өчен форма вәгъдә итәләр

(Казан, 20 апрель, «Татар-информ»). Инстаграм социаль челтәрендәге «Казан Арена» стадионының ялган аккаунтына язылган өчен бүләккә форма вәгъдә итәләр.

Ялган аккаунт хуҗалары беренче мең язылучыга 2018 елгы футбол буенча Дөнья чемпионаты формасын тапшырачак, дип ышандыралар.

Стадион администрациясе хәбәр иткәнчә, әлеге мәгълүмат һәм «Казан Арена» стадионы исеменнән төрле бүләк уйнатулар – барысы да ялган.

Инстаграм социаль челтәрендәге «Казан Арена» стадионының рәсми аккаунты – @kazanarena.