Җәмгыять 19 май 2021 13:43

Казандагы фаҗигадән соң татарстанлыларда законсыз сакланган 40 корал алынган

Фәрит Мөхәммәтшин сүзләренчә, корал әйләнеше һәм саклау темасы аерым игътибар һәм тиешле чаралар күрүне таләп итә.

Скопировать ссылку

(Казан, 19 май, «Татар-информ», Надежда Гордеева). Казанның 175нче гимназиясендә фаҗигадән соң Росгвардия Татарстанда яшәүчеләрдә законсыз сакланган кырыкка якын корал тапкан. Бу хакта ТР Дәүләт Советы Рәисе Фәрит Мөхәммәтшин Татарстан Матбугат көне уңаеннан массакүләм мәгълүмат чаралары вәкилләре белән очрашуда әйтте.

«Росгвардия көчләре белән гражданнар коралының әйләнешен тикшерү эшләре тулы көченә бара. Кешедә законсыз сакланган кырыкка якын корал булуы ачыкланган. Аларны хуҗаларыннан алганнар, хисапка куйганнар», — диде парламент башлыгы.

Аның сүзләренчә, корал әйләнеше һәм саклау темасы аерым игътибар һәм тиешле чаралар күрүне таләп итә.

«Безне халыкта корал саклану гына борчымый. Коралга рөхсәт бирү өчен медицина бәяләмәсе бирүне контрольдә тотуны катгыйландырырга кирәк. Шәхси компанияләр моңа хокукы булмаган, сәламәтлек торышын тикшермичә диярлек корал алуга рөхсәт бирә. Бу очракны да караячакбыз», — диде Дәүләт Советы Рәисе.

11 майда Казанның 175нче гимназиясендә атыш нәтиҗәсендә тугыз кеше үлгән — җиде бала һәм ике укытучы, 20дән артык кеше хастаханәгә озатылган.

Сәхифәләр

Казандагы фаҗигадән соң татарстанлыларда законсыз сакланган 40 корал алынган