“Татар-информ” МА ТР буенча Баш федераль инспекторның Рәхмәт хаты белән бүләкләнде

  (Казан, 19 май, «Татар-информ», Алсу Гатауллина). “Татар-информ” МА генераль директоры Леонид Толчинский һәм агентлык коллективы профессиональ осталык, үз эше өчен җаваплы булуы һәм Татарстанда яшәүчеләргә файда китерү теләге өчен ТР буенча баш федераль инспекторның Рәхмәт хаты белән бүләкләнде.

“Бүген лаеклы бәйрәм - Татарстан Матбугат көне. Күп еллар дәвамында хезмәттәшлек итүебезгә шатмын. Кайвакыт бәхәсле мәсьәләләр туа, әмма без аңлашу, дәүләт бурычларын, җәмәгатьчелек ихтыяҗын үтәү буенча дөрес алымнар таба белдек. Сезнең хезмәтегез җиңел булмавын аңлыйм. Бер үк вакытта бөтенесенә дә ярау мөмкин түгел. Әмма сезнең һөнәрегез шул. Сезгә һәрвакыт кирәкле урында кирәкле вакытта булырга телим. Сез ясаган җыйнак һәм төгәл нәтиҗәләр шик уятырлык булмасын”, - диде котлаганда ТР буенча Баш федераль инспектор Ренат Тимерҗанов.

Шулай ук “Татамедиа” Республика матбугат һәм массакүләм коммуникацияләр агентлыгы җитәкчесе Ирек Миңнәхмәтов та Рәхмәт хаты белән бүләкләнде. “Казан” ТРК һәм “Татарстан” БДТРК коллективларына да Рәхмәт хатлары тапшырылды.