ЗАГС архивларын цифрлаштырганда татар һәм гарәп теле тәрҗемәчеләре җәлеп ителәчәк
Россиядә ЗАГС архивларын цифрлаштыру һәм федераль реестрга кертү өчен 1 млрд сум чамасы акча бүлеп бирелә.
(Казан, 18 октябрь, «Татар-информ»). Россиядә Гражданлык хәле актларын теркәү (ЗАГС) архивларын цифрлаштыру һәм федераль реестрга кертү өчен 1 млрд сумнан артык акча бүлеп биреләчәк. Татар һәм гарәп телләрендәге тарихи язмалар белән профессиональ тәрҗемәчеләр эшлиячәк. Россия Премьер-министры Михаил Мишустин имзалаган карар Россия Хөкүмәте сайтында урнаштырылган.
«633415» саннарын «1745297,8» саннарына үзгәртергә», — диелә карарда.
Карар нигезендә, 1926 елдан башлап ясаган язмалар цифрлаштырылачак. Алардан бердәм федераль ЗАГС реестры булдырылачак.
Кайбер язмаларның татар һәм гарәп телләрендә булуы ачыкланган. Аларны цифрлаштырганчы, тәрҗемә итәргә кирәк булачак, моның өчен профессиональ тәрҗемәчеләр җәлеп ителәчәк.
Тарихи документларны цифрлаштыруны ел ахырына кадәр төгәлләү планлаштырыла.