Санитар-экологик чисталык икеайлыгы барышында Әлмәттә 14 меңгә якын агач утыртылган

Район һәм шәһәрдә әлеге чара 1 апрельдә старт алган иде

 (Казан, 18 июнь, “Татар-информ”). Әлмәттә санитар-экологик чисталык икеайлыгына нәтиҗә ясадылар. Башкарма комитетта Әлмәт муниципаль районы башлыгы Мәҗит Салихов рәислегендә киңәшмә булып узды. Шәһәр һәм районда чисталык икеайлыгы 1 апрельдә старт алган иде.

“Бездә ул ике айдан да артыграк дәвам итте. Бу вакыт эчендә шәһәрдә 6892, авыл җирлекләре территорияләрендә 7 меңнән артык агач утыртылды. Без 9 санитар җомга үткәрдек, 2 өмә оештырылды. Аларда барлыгы 65 мең тирәсе кеше катнашты, 1196 берәмлек техника җәлеп ителде, 1347 машина чүп чыгарылды”, - диде үз чыгышында район башлыгы.

Икеайлык барышында законсыз оештырылган чүплекләрне ачыклау буенча зур эш алып барылган, дип хәбәр итә ТР муниципаль берәмлекләре порталы.