Әтнәнең кайбер предприятиеләрендә хезмәт хакы бирү таләпләре бозылган

Әтнә районы прокуратурасы тарафыннан район предприятиеләрендә хезмәт законы үтәлеше тикшерелгән

(Казан, 18 июнь, “Татар-информ”, Гөлнар Гаттарова). Әтнә районы прокуратурасы, районның “Дусым”, “Күлле-Киме”, “Сельхозтехника”, “Тукай” җаваплылыгы чикләнгән җәмгыятьләрендә, “Мәнгәр”, “Кушар”, “Шахтер”, “Ташчишмә”, “Таң” авыл хуҗалыгы җитештерү кооперативларында һәм башка оешмаларда хезмәт законы үтәлешен тикшергән, дип хәбәр итә ТР прокуратурасының матбугат хезмәте.
РФ Хезмәт кодексының 136 нчы маддәсе нигезендә, айлык хезмәт хакы һәркемгә ике тапкырга бүленеп бирелергә тиеш. Тикшерү барышында ачыкланганча, югарыда күрсәтелгән оешмаларда хезмәт хакы айга бер мәртәбә генә бирелгән. Тикшерү нәтиҗәләре буенча, законны бозган предприятие җитәкчеләренә һәм аларның баш хисапчыларына карата административ эш кузгату турында 18 карар чыгарылган.