КДХТУнда быел янә яңа белгечлекләр арткан

Әйтергә кирәк, әлеге уку йортында белем алучыларның географиясе дә шактый киң

(Казан, 17 июль, “Татар-информ”, Рәсилә Кәримова). Казан дәүләт химия-технология университетында быел да яңа факультетлар ачылган. Әлеге исемлектә сервис хезмәте, нанотехнология бүлекләре бар, дип белдерде бүген “Татар-информ” мәгълүмат агентлыгында узган видеоконференциядә әлеге уку йортының ректоры, технология фәннәре докторы Герман Дьяконов.
Мәртәбәле уку йортларыннан саналган технология университеты республиканың шәһәр-районнарыннан гына түгел, ә Россия төбәкләреннән, башлыча, Урал, Себер якларыннан яшьләрне үзенә җәлеп итә икән. Исемлектә шулай ук Көньяк-Көнчыгыш Азия илләре — Кытай, Вьетнам, шулай ук Гарәп Әмирлекләреннән дә студентлар шактый. Бүгенге көндә аларның саны 250гә җитә.
“Билгеле булганча, уку йортында укучыларның географиясе шактый киң. Шунысын да билгеләп үтәргә кирәк: без күп кенә Россия төбәкләрендәге предприятиеләр белән хезмәттәшлек итәбез һәм шуның нәтиҗәсендә безнең уку йортына чит төбәкләрдән студентлар укырга җибәрелә”, - дип белдерде ректор.