Тукай районы хакимияте КФУда укучы чит ил студентларына азык-төлек белән ярдәм иткән

Институтның инстаграм челтәрендәге рәсми аккаунтында Тукай районы башлыгы Фаил Камаевка рәхмәт җиткерәләр.

(Казан, 17 апрель, «Татар-информ», Гөлнар Гарифуллина). Тукай районы КФУның Яр Чаллы институтында белем алучы чит ил студентларына ярдәм иткән. Аларга азык-төлек һәм беренче кирәк-яраклар китерелгән. Бу хакта «Татар-информ» хәбәрчесенә Тукай районы матбугат хезмәте җитәкчесе Рөстәм Зәкиев хәбәр итте.

Төркмәнстан, Таҗикстан, Казахстан, Үзбәкстан, Конго һәм Нигериядән килгән 900 студент коронавирус аркасында катлаулы хәлгә эләккән. Катлаулы матди хәл эшне югалту, халыкара акча күчерү мөмкинлеге булмау аркасында килеп чыккан. Студентларга карабодай, дөге, макарон, май, шикәр һәм чәйдән торган 900 азык-төлек пакеты тапшырылган.

«Шулай ук, район башлыгы Фаил Камаев 2,5 тонна бәрәңге, берәр тонна чөгендер һәм кишер, 10 капчык он тапшырды. Азык-төлек туплауда районның авыл хуҗалыгы предприятиеләре, оешмалары, авыл җирлекләре, шулай ук гади халык ярдәм итте», — диде Рөстәм Зәкиев.

Инстаграмм челтәрендә институтның рәсми аккаунтында Тукай районы башлыгы Фаил Камаевка авыл тормыш хәлендә калган студентларга ярдәм итүгә өлеш кертүе өчен рәхмәтен җиткерелә.