«Россия тимер юллары» хәрәкәт иминлеге өчен көрәшә

(Казан, 17 гыйнвар, «Татар-информ»). Билгеле булганча, «Россия тимер юллары» ААҖ дә тимер юл аркылы чыгу урыннарында хәрәкәт иминлеген артыру буенча 2006-2010 елларга исәпләнгән программа гамәлгә ашырыла. Компаниянең рәсми сайты мәгълүматларына караганда, узган ел дәвамында программа нигезендә 150 гә якын шундый урын шлагбаумнар, резина түшәмәләр белән җиһазландырылган. Моннан тыш, 15 юл чыгу урынына сигнализация системасы куелып, 18 ендә ЮХИДИ органнары белән телефон элемтәсе урнаштырылган. 156 урында капиталь төзекләндерү эшләре үткәрелгән.
Быел иминлек чаралары масштабы тагын да артыр дип көтелә. 2008 ел дәвамында «Россия тимер юллары» җәмгыяте 731 тимер юл аша чыгу урынына капиталь төзекләндерү үткәрү бурычын куя. Быелгы планга шулай ук 23 яңа юл үткәргеч төзү, 504 урынга резина түшәмә салу, юл кичүләрендәге җиһазларны модернизацияләү кертелгән.
Заманча җиһазлар урнаштыру, вакытында капиталь ремонт башкаруның юл-транспорт һәлакәтләре чыгу ихтималын киметүе бәхәссез. Тик тимер юл һәм автомобиль трассалары кисешендә куркынычсызлыкны тәэмин итү өчен транспорт йөртүчеләрнең кагыйдәләрне төгәл үтәве дә кирәк, дип белдерә «Россия тимер юллары» җитәкчелеге.