“Татар-информ” агентлыгына “Алтын мөнбәр” I Халыкара кинофестивале оештыручыларыннан рәхмәт хатлары килде

(Казан, 16 сентябрь, “Татар-информ”). “Алтын мөнбәр” I Халыкара мөселман киносы фестивале чараларын яктыртуда актив катнашкан өчен “Татар-информ” мәгълүмат агентлыгы исеменә кинофестиваль директоры Светлана Бохараева һәм ТР “Татмедиа” массакүләм коммуникацияләр агентлыгы генераль директоры Марат Моратовтан рәхмәт хатлары килде.

Россия Мөфтиләр шурасы инициативасы буенча гамәлгә кертелгән “Алтын мөнбәр” кинофестивален үткәрү идеясен Татарстан Президенты Минтимер Шәймиев хуплады. Фестиваль 5-11 сентябрьдә Казанда үтте һәм Татарстан башкаласының 1000 еллыгын бәйрәм итүгә багышланган иде.

“Татар-информ” агентлыгы беренче мөселман киносы фестивале барышын актив яктыртты, дип билгеләп үтелә рәхмәт хатларында. Моннан тыш, “Татар-информ” агентлыгы каршында нәшер ителә торган “Tatatr ile” газетасының эчке ягы тулысынча “Алтын мөнбәр”гә багышланган иде.