Зәйдә кечкенә балаларның тәрәзәдән егылып төшү, өйдән чыгып китү очраклары бар

(Казан, 15 июль, “Татар-информ”). Зәй районы балигъ булмаганнар эшләре һәм яшүсмерләрнең хокукларын яклау комиссиясенең чираттагы утырышында 23 эш каралган. 

Каралучы эшләр арасында спиртлы эчемлек кулланып, полициягә эләккән яшүсмерләр буенча дә, балаларына тиешле игътибар бирмәүче әти-әниләр буенча да эшләр бар. Бер кечкенә баланың икенче кат тәрәзәсеннән егылып төшүен, икенче бер бакча яшендәге баланың өйдән чыгып китүен ата-аналары күрми кала. Бу фактлар комиссия утырышында аеруча басым ясап тикшерелде, дип яза “Зәй офыклары” газетасы.