Яңа Татар бистәсе зираты эше буенча шатланырлык әйберләр юк — Артем Хохорин

(Казан, 16 февраль, “Татар-информ”, Лилия Локманова). Яңа Татар бистәсе зиратында кылынган җинаять эше буенча әлегә эш бара, әмма әле шатландырырлык нәтиҗәләр юк. Татарстан Республикасы буенча эчке эшләр министры Артем Хохорин бүген ТР парламентының 25 нче утырышында шулай дип белдерде.

“Кызганычка әлегә шатландырырлык әйберләр юк. Бу мәсьәлә контрольдә, эш алып барыла”, - диде ул депутатлар сорауларына җавап биреп.

Мәгълүм булганча, 8 сентябрь көнне Россия Эчке эшләр министрлыгының Казан буенча идарәсе “Промышленный” полиция бүлегенең дежур частена Яңа Татар бистәсе зираты администрациясеннән 100ләп кабер ташын җимерүләре турында хәбәр килгән иде.

Бу факт буенча РФ ҖК 244 маддәсенең 2 нче часте ("Мәрхүмнәрне һәм алар җирләнгән урынны мыскыллау") билгеләре буенча җинаять эше кузгатылды.